L fova d’autonn dl 1972...

...che bera Engl Runggaldier dal Ampezan se ova cruzià de abiné adum n valgun ciantarins per pudëi datrai se la cianté deberieda. Nsci nen fovel riesc ruvei adum n valguni che se ova dat ju cun l cianté y l mparé ite cun gran lezitënza y pascion, n valguna cianties. Te curt tëmp se ovel abinà adum 36 ciantarins.

La prima atività dl cor fova chëla de cianté pra sëires de bona ueia. Bën prësc an pona scumencià a mparé ite vel’ Santa mëssa y de nueva cianties. Danter l auter ne univel nia schivà de mparé ite nce pec tlassics acumpaniei da tlavir o da d’autri strumënc.

Sce n ti cëla ala statistica che ie unida fata pona vëijen che l à ciantà pra 346 Santa mësses de supeltura. La legrëza per l cianté y l sté n cumpania, che ie dessegur nce la finaliteies de n cor, à judà pea che duc tënie for adum. L à abù mumënc de legrëza y de tristëza; te duc chisc 50 ani ne n’iel unit a mancë bën 17 ciantarins.

Ncueicundì ie Lukas Perathoner dl Orp l sëurastant dl cor che se cruzia dantaldut dl’urganisazion. L dirighënt da śën ie Samuel Runggaldier. Messon bën dì che l Cor Sasslong à for abù la fertuna de avëi de bon dirighënc, y perchël ie l livel dl cor for chersciù. Da ann a ann iesi jic a vëncer pra de plu cuncorsc, a livel naziunel y nternaziunel. Tlo muessen dessegur auzé ora Willy Runggaldier dal Ampezan che à fat l dirighënt per bën 14 ani.

Sce n ti cëla de reviers a si atività scumencian dai prim ani, po’ vëijen che bele dl 1974 à l cor fat pea l prim iede pra n cuncors: l se tratova de n cuncors regiunel ENAL a Bulsan dedicà ai “Canti della Montagna”. Y bel de paca ova ntlëuta l cor arjont n segondo post. Granda fova la legrëza do apëina doi ani de atività. Ntant ie l cor for jit inant fajan pea pra de plu ancuntedes, cuncorsc, festival y d’uni sort de manifestazions a livel naziunel y nternaziunel. Y nsci al pudù festejé i 10 y i 20 de atività.

Chësta ie n pue’ la storia di prim ani, dessegur nia tan saurida. Plu dovia tl cudejel abinen la segonda pert de si storia.